Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyində “Nizami Gəncəvi: təbiətə sevginin ədəbi ifadəsi” mövzusunda konfrans təşkil olunub.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İctimaiyyətlə əlaqələr şöbəsindən AZƏRTAC-a bildiriblər ki, konfrans “ASAN Könüllüləri” Təşkilatı və Nizami Gəncəvi Beynəlxalq Mərkəzinin birgə təşkilatçılığı ilə həyata keçirilən “Hər canlı bir incidir” layihəsi çərçivəsində baş tutub.
Konfransın məqsədi böyük şairin yaradıcılığı, onun təbiətin mühafizəsi ilə bağlı fikir və ideyalarını könüllülərə aşılamaq, eləcə də bu istiqamətdə təbliğatı təmin etməkdir.
Tədbirdə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədr müavini Ceyhun Salmanov, Nizami Gəncəvi Beynəlxalq Mərkəzinin Baş icraçı direktoru Elnur Əliyev, Azərbaycan Yazıçılar Birliyinin Yaradıcılıq məsələləri üzrə katibi, yazıçı, kinodramaturq İlqar Fəhmi və digər qonaqlar iştirak ediblər.
Qeyd edilib ki, “Hər canlı bir incidir” layihəsi Prezident İlham Əliyev tərəfindən elan edilmiş “Nizami Gəncəvi İli” çərçivəsində həyata keçirilir. Məqsəd ətraf mühitin mühafizəsi, bu sahədə cəmiyyət arasında məsuliyyətin artırılması, eləcə də gənclərin iştirakçılığının təmin edilməsidir. Layihə çərçivəsində bir sıra müxtəlif vacib tədbirlərin təşkili nəzərdə tutulur.
Sonda iştirakçıların sualları cavablandırılıb.
